ნინო კაჟაშვილმა დაამთავრა ივანე ჯავახიშვილის სახ. თბილისის სახელმწიფო უნივერსიტეტის მექანიკა-მათემატიკის ფაკულტეტი. ასევე, სწავლობდა საქართველოს ტექნიკურ უნივერსიტეტში ინფორმატიკისა და მართვის სისტემების ფაკულტეტზე. ნინო, 2006 წლიდან დღემდე, სხვადასხვა პროგრამის ფარგლებში თანამშრომლობს განათლებისა და მეცნიერების სამინისტროსთან. არის მასწავლებელთა პროფესიული განვითარების ეროვნული ცენტრის ინფორმაციულ-საკომუნიკაციო ტექნოლოგიების ტრენერ-კონსულტანტი და იმავდროულად, რამდენიმე ტრენინგ-მოდულის ავტორი/თანაავტორი; თანამშრომლობდა ინოვაციების და ტექნოლოგიების სააგენტოსთან (Gita), იყო Front-End Development ტრენერი. ასევე, თანამშრომლობდა საერთაშორისო კვლევისა და გაცვლების საბჭოს (IREX) თბილისის ფილიალთან პროექტის „ისწავლე, რათა ამოიცნო“ ფარგლებში; იყო მედიაწიგნიერების მასტერ ტრენერი და მოდულის შინაარსის მოდიფიცირების სამუშაო ჯგუფის წევრი. თანამშრომლობს კომუნიკაციების ეროვნულ კომისიასთან, ატარებს ტრენინგებს „დეზინფორმაცია, როგორც გამოწვევა - კრიტიკული აზროვნების განვითარება სკოლებში“. 

ამჟამად, ნინო მუშაობს სახელმწიფო სერვისების განვითარების სააგენტოში, არის ინფორმაციული უსაფრთხოების მენეჯერი. პარალელურად, თანამშრომლობს საერთაშორისო სკოლა „ალგორითმიკა“-სთან, კითხულობს კურსს ვიზუალურ პროგრამირებაში.

ხათუნა ციხელაშვილმა დაამთავრა ისრაელის აკადემიური კოლეჯი. ხათუნა მრავალი წელი მუშაობდა სკოლაში ისტ-ის მასწავლებლად და საინფორმაციო მენეჯერად; არის არაერთი სატრენინგო მოდულის ავტორი; მრავალი წელია ატარებს სხვადასხვა ტიპის ტრენინგებს ტექნოლოგიების მიმართულებით;  არის ქართული ენის დისტანციური სკოლის მენეჯერი, რომელიც ქართულ ენას ასწავლის უცხოეთში მცხოვრებ 800-მდე ქართველ მოსწავლეს 36 ქვეყნიდან; თანამშრომლობს კომუნიკაციების ეროვნულ კომისიასთან დეზინფორმაციის პრევენციის დარგში. ამჟამად მუშაობს მასწავლებელთა პროფესიული განვითარების ეროვნულ ცენტრში „ციფრული ტექნოლოგიების დანერგვის ხელშეწყობის ქვეპროგრამის“ მენეჯერად.

ნინო მეხრიშვლმა  დაამთავრა ივანე ჯავახიშვილის სახ. თბილისის სახელმწიფო უნივერსიტეტის კიბერნეტიკისა და გამოყენებითი მათემატიკის ფაკულტეტი და ხელოვნების (შემდგომში საზოგადოებრივ პროფესიათა) ფაკულტეტი მუსიკისმცოდნეობის სპეციალობით. მრავალი წელი მუშაობდა საქართველოს წყალმშენის სამინისტროს საინფორმაციო გამოთვლითი ცენტრის სისტემური პროგრამირების განყოფილებაში უფროს/წამყვან ინჟინერ-პროგრამისტად, შემდგომ, გარკვეული პერიოდი მოსწავლე-ახალგაზრდობის სახლის სამუსიკო სტუდიის გამგედ და მუსიკის თეორიული საგნების მასწავლებლად. მომდევნო ეტაპზე მუშაობდა გაერთიანებული ქართული ბანკის #41 ფილიალის მთავარ სპეციალისტად.

ბოლო პერიოდში დღემდე მუშაობს მოსწავლე-ახალგაზრდობის სახლის ფინანსური განათლების წრის მასწავლებლად. გავლილი აქვს საქართველოს ეროვნული ბანკის ფინანსური განათლების დეპარტამენტის მიერ ორგანიზებული სასკოლო პროექტის „სკოლა-ბანკის“ ტრენინგის კურსი და არის სერტიფიცირებული ტრენერი.